Një ngjarje që për pak mund të ishte shndërruar në një tragjedi, ku automjeti mund ta përplaste këmbësorin në vijat e bardha, duke i rrezikuar jetën është shmangur për fije të perit. Këtë herë, një ngjarje e kësaj natyre do të kishte qenë më e rëndë, pasi do të ishte kryer pikërisht nga ata persona që supozohet të na mbrojnë dhe shërbejnë, punonjësit e Policisë së Shtetit.
Pavarësisht se kohët e fundit Policia Rrugore ka shtuar kontrollet për kapjen dhe parandalimin e shkeljeve të rregullave të qarkullimit rrugor, me vendosjen të postblloqeve në rrugët kryesore dhe shtimin e kontrolleve me radarë e dragera me qëllim rritjen e parametrave të sigurisë, me sa duket as vetë policët nuk i respektojnë rregullat e qarkullimit rrugor.
Një rast i denoncuar nga qytetarët ka të bëjë me disa pamje, që po bëjnë xhiron e rrietit, në të cilat duket qartë se makina e policisë shkel rregullat rrugore.
Nga fotoja në fjalë, makina e policisë me targa “AA852RU” nuk ndalon në vijat e bardha, duke mos i dhënë përparësi të moshuarit, i cili pret të kalojë rrugën. Edhe pse i moshuari ka të drejtën e përparësisë, makina e policisë e injoron dhe vazhdon rrugën.
Ndërkaq, policia pretendon se vijon punën, me kontrolle dhe ndëshkime të intensifikuara për të parandaluar këto shkelje, kurse punonjësit e saj kryejnë pikërisht shkeljet për të cilat dënojnë qytetarët dhe kundër të cilave duhet të jenë shembull për të tjerët.